"சோமலெயின் செட்டிநாடும் செந்தமிழும்"

           செட்டிநாட்டார் செந்தமிழுக்கு செய்திருக்கும் சேவைகள் ஏராளம். திரைக்கடல் ஓடித் திரவியம் திரட்டப் பல அயல்நாடுகளுக்கு சென்றிருந்தாலும் அங்கும் தமிழை வளர்ப்பதையே முதற்கண் காரியமாக கொண்டிருந்துள்ளனர். எப்பொழுதும் முத்தமிழை வளர்த்து வருபவர்கள் என்ற வரிசையில் முதலில் நிற்பவர்கள் நாட்டுக்கோட்டை நகரத்தார்கள் என்பதை நாடறியும்.

செட்டிநாடும் தமிழும்:

'உலகம் சுற்றிய தமிழர்' என புகழாரம் சூட்டப்படும் சோமலெ அவர்கள் 1954ஆம் ஆண்டில் 'செட்டிநாடும் தமிழும்' எனும் நூலை எழுதினார், இந்நூல் செட்டிநாட்டின் வரலாற்றை கூறுவதாக அமைந்தது . இந்நூலின் இரண்டாம் பதிப்பு 1960ஆம் ஆண்டில் வெளிவந்தது. பின்னர் இந்நூலில் மேலும் பல திருத்தங்கள் செய்து, விரிவுபடுத்தி 'செட்டிநாடும் செந்தமிழும்' எனும் தலைப்பில் 1984ஆம் ஆண்டு வெளியிட்டார். செட்டிநாடு எனும் பலகணி மூலம் தமிழ்கூறும் நல்லுலகை காண 'செட்டிநாடும் செந்தமிழும்' எனும் இந்நூல் பெரிதும் உதவி புரிகிறது. 

செட்டிநாடு யாது?:

ஏழு வட்டகைகள் எழுபத்தியாறு ஊர்கள் என்பதே செட்டிநாடு. இந்நூலில் ஏழு வட்டகைகளையும் எழுபத்தியாறு ஊர்களையும் பட்டியலிடும் சோமலெ, ஒவ்வொரு ஊரின் தனிச்சிறப்புகளை எடுத்துக் கூறியுள்ளார்.

" வெள்ளாறது வடக்காமேற் குப்பிரான் மலையாத் 

தெள்ளார் புனல்வைகை தெற்காகும் - ஒள்ளிய நீ

ரெட்டிக் கடற்கிழக்கா மிஃதன்றோ நாட்டரசன்சேர் 

செட்டிநாட் டெல்லையெனச் செப்பு"

என்ற பாடலின் மூலம் செட்டிநாட்டு எல்லைக்கு வரையறை வகுத்தப் பெருமை பாடுவார் முத்தப்பரை சேரும் என்றால்! வரைபடம் வரைந்த பெருமை 'சோமலெ'வை சேரும்! முதன் முதலில் செட்டிநாட்டின் வரைபடம் இந்நூலில் தான் இடம்பெற்றுள்ளது. இந்த வரைபடத்தில் 9கோயில்களும் நகரத்தார் வாழக்கூடிய 76 ஊர்களும் அருகாமையில் உள்ள ஊர்களும் அவற்றை இணைக்கக்கூடிய சாலைகளும் இரயில் தடங்களும் இடம்பெற்றுள்ளன.

செட்டிநாடும் செந்தமிழும்:

இந்நூல் நகரத்தார் செய்த தமிழ் பணியை கூறுவதாக மட்டும் அமையாமல் செட்டிநாட்டில் வாழக்கூடிய அத்தனை சமூகத்தினரும் தமிழுலகத்திற்கு ஆற்றியிருக்கும் அறப்பணிகளை எடுத்துரைப்பதாக அமைந்துள்ளது.

  

716பக்கங்களை கொண்ட இப்பெரும் நூல் சங்க காலம் முதல் சமகாலம் வரையிலான தமிழ்கூறும் செட்டிநாட்டு நிலப்பகுதியின் வரலாற்றை 40 தலைப்புகளில் சொல்கிறது. பின்னிணைப்பாக 24 தலைப்புகளில் பல அரிய செய்திகளும், கட்டுரைகளும், புள்ளிவிபரங்களும் இணைக்கப்பட்டுள்ளது இந்நூலின் கூடுதல் சிறப்பாகும்.

தமிழ் பண்பாட்டுக்கு கட்டியம் கூறும் "யாதும் ஊரே யாவரும் கேளிர்" என்னும் சொற்றொடரை ஈன்றது செட்டிநாடு என இந்நூலின் முதல் பக்கத்தை தொடங்கும் நூலாசிரியர் சோமலெ, சங்ககாலம், சிலப்பதிகார காலம், பல்லவர் காலம், சோழர் காலம், பாண்டியர் காலம் எனக் கடந்து சமகாலம் வரையிலான செட்டிநாட்டின் செந்தமிழ் வரலாற்றை வர்ணிக்கிறார்.

செட்டிநாட்டு வீட்டின் அமைப்பு முறை, மங்கல நிகழ்ச்சிக்கு காப்புக் கட்டும் முறை, மணமக்களை வாழ்த்தும் முறை ஆகியவற்றை சங்க கால இலக்கியங்களோடு ஒப்பிட்டும், சுமார் எழுபது ஆண்டுகளுக்கு முன்பு வரை நகரத்தார் சமூக பெண்கள் கடல் கடப்பதில்லை என்பதை சங்க கால மரபுகளோடு சான்றுடன் ஒப்பிட்டும் விளக்குகிறார்.

தமிழுக்கு ஒப்பனையாக விளங்கும் செட்டிநாட்டு ஒப்பாரியையும், தாளத்துடன் பாடப்படும் தாலாட்டையும் ஆய்வு செய்து தனித்தனி கட்டுரைகளாக இந்நூலில் பதிவுசெய்துள்ளார். இதுவே பின்னாளில் சிலர் நகரத்தார் தாலாட்டு மற்றும் ஒப்பாரி குறித்து முனைவர் பட்ட ஆய்வு செய்ய பேருதவியாக இருந்துள்ளது.

பர்மா, மலேசியா இலங்கை, சிங்கப்பூர், வியட்நாம், தாய்லாந்து, லண்டன், அமெரிக்கா ஆகிய அயல் தேசங்களில் செட்டிநாட்டவர்கள் செய்திருக்கும் தமிழ்ப்பணிகளை இந்நூலில் திறம்பட தொகுத்தளித்துள்ளார்.

செட்டிநாட்டார் ஆதரித்த புலவர்கள் நூற்றுக் கணக்கானோர். அவர்களை இந்நூலில் ஆங்காங்கே குறிப்பிடுவதுடன். 19ஆம் மற்றும் 20ஆம் நூற்றாண்டுகளில் செட்டிநாட்டார் ஆதரித்த புலவர்பெருமக்கள் பலரின் விபரங்களை இந்நூலில் கொடுத்துள்ளார் மற்றும் 18ஆம் நூற்றாண்டு முதல் 20ஆம் நூற்றாண்டின் தொடக்கம் வரை செட்டிநாட்டில் சிறப்புடன் வாழ்ந்து வந்த பெரும் புலவர்களின் வரலாற்றையும் எழுதியுள்ளார் மேலும் பாடுவார் முத்தப்பர் உள்ளிட்ட நகரத்தார் மரபு புலவர்கள் வரலாற்றையும் அவர்கள் இயற்றிய நூல்களையும் தொகுத்தளித்துள்ளார்.

பதிப்பகத்துறை, இதழியல் துறை, சிற்பக் கலைத்துறை, தமிழிசைத்துறை, நூலகத்துறை, பயண இலக்கியத்துறை, குழந்தை இலக்கியத்துறை ஆகியவற்றில் செட்டிநாட்டவர் ஆற்றியிருக்கும் பங்குகளை இந்நூலில் விரிவாக விவரித்திருக்கிறார்.

பின்னிணைப்பில் "யார் எவர்?" என்ற தலைப்பின் கீழ் செட்டிநாட்டை பூர்வீகமாக கொண்ட சாதனையாளர்கள் பலர் பற்றிய தனிக்குறிப்புகள் இடம்பெற்றுள்ளன.

போற்றுவோம்:

"எல்லா நாடும் தன் நாடாய், 

எங்கும் சுற்றி ஆராய்ந்து 

நல்லார் பலரின் கருத்தையெலாம் 

நாளும் தேடித் தமிழ்மக்கள் 

பல்லார் அறியச் செந்தமிழில் 

பண்பாய் உரைக்கும் என்நண்பன் 

சொல்லால் அமுதை வென்றிடுவோன் 

சோம இலக்கு மணன்வாழ்க" 

என்று கவிமணி தேசிக விநாயகம் பிள்ளை அவர்கள் சோமலெயை போற்றுகிறார்.

சோமலெ ஒரு சிறந்த படைப்பாளராகவும் ஆய்வாளராகவும் சமுதாயச் சிந்தனையாளராகவும் திகழ்ந்து தமிழுக்கும் தமிழ்ச் சமூகத்திற்கும் பல்வேறு பணிகளை ஆற்றியுள்ளார். தன் வாழ்நாளின் பெரும்பகுதியைப் தமிழுக்காக செலவிட்டு இலக்கியப் பணியோடு பல சமுதாய நற்பணிகளையும் செய்துள்ளார். 80க்கும் அதிகமான நூல்களை படைத்துள்ளார். அத்தனை நூல்களும் தமிழ்கூறும் நல்லுலகால் என்றென்றும் போற்றப்படக்கூடியது. அவற்றுள் முதன்மையாக திகழ்வது "செட்டிநாடும் செந்தமிழும்" நூல். சோமலெ அரிதின் முயன்று பல செய்திகளையும் சான்றுகளையும் சேகரித்து செந்தமிழ் கலைக்களஞ்சியமாகவே இந்நூலை படைத்துள்ளார். இது செட்டிநாட்டவர் மட்டுமின்றி தமிழர்கள் அனைவரும் படித்துப் பயன்பெற்ற வேண்டிய அரிய நூல்.

- பழ.கைலாஷ் 

வேந்தன்பட்டி கும்பாபிஷேக மலர் - 2024